ܐܟܕܡܝܐ ܬܒܝܠܝܬܐ ܕܠܫܢܐ ܣܘܪܝܝܐ ܐܪܡܝܐ

ܠܫܢܐ ܐܪܡܝܐ ܐܝܬܘܗܝ ܚܕ ܡܢ ܠܫܢ̈ܐ ܥܬܝܩ̈ܐ ܕܒܥܠܡܐ ܘܟܒܪ ܐܝܬܘܗܝ ܥܬܝܩ ܡܢ ܟܠܗܘܢ ܠܫܢ̈ܐ ܕܝܘܡܢܐ ܕܒܥܠܡܐ: ܘܡܬܡܬܚ ܢܘܓܪܐ ܕܚܝ̈ܘܗܝ ܐܝܟ ܕܒܒܨܝܪܘ ܠܝܬܝܪ ܡܢ ܬܠܬܐ ܐܠܦ̈ܐ ܫܢܝ̈ܢ. ܘܟܬܝܒܬܗ ܐܠܦܒܝܬܝܬܐ ܗܘܬ ܐܡܐ ܕܟܬܝܒ̈ܬܐ ܣܓܝ̈ܐܬܐ ܒܥܠܡܐ: ܒܡܕܢܚܐ ܟܝܬ ܘܒܡܥܪܒܐ. ܐܬܦܪܣ ܠܫܢܐ ܐܪܡܝܐ ܒܟܠܗ̇ ܦܢܝܬܐ ܕܡܕܢܚܐ ܡܨܥܝܬܐ ܘܗܘܐ ܠܫܢܐ ܕܬܓܪܘܬܐ ܘܕܐܣܖ̈ܐ ܘܕܡܫܝܚܝܘܬܐ ܘܕܬܘܕܝ̈ܬܐ.

ܘܟܕ ܐܬܝܠܕ ܡܪܢ ܝܫܘܥ ܡܫܝܚܐ ܝܠܦ ܠܫܢܐ ܐܪܡܝܐ ܐܒܗܝܐ ܡܢ ܐܡܗ ܡܪܝܡ ܘܒܪ ܙܘܓܗ̇ ܝܘܣܦ ܘܡܠܠ ܒܗ. ܒܙܒܢ̈ܐ ܕܩܕܡ ܡܫܝܚܐ ܠܫܢܐ ܐܪܡܝܐ ܐܝܬܘܗܝ ܗܘܐ ܠܫܢܐ ܕܟܠܗܝܢ ܡܠܟܘ̈ܬܐ ܕܐܖ̈ܡܝܐ ܒܡܕܢܚܐ ܡܨܥܝܬܐ. ܘܗܘܐ ܕܝܢ ܠܫܢܐ ܬܒܝܠܝܐ ܘܒܗ ܡܠܠܘ ܥܡܡ̈ܐ ܘܐܡܘ̈ܬܐ ܐܚܖ̈ܢܐ.

ܒܙܒܢ̈ܐ ܕܝܢ ܕܒܬܪ ܡܫܚܝܐ ܐܫܬܘܫܛ ܠܫܢܐ ܐܪܡܝܐ ܒܝܕ ܐܖ̈ܡܝܐ ܡܫܝ̈ܚܝܐ ܒܥܕܬܐ ܣܘܪܝܝܬܐ܆ ܘܗܘܐ ܡܐܢܐ ܪܝܫܝܐ ܕܣܘܪ̈ܝܝܐ ܡܫܝ̈ܚܝܐ ܘܕܥܕܬܐ ܣܘܪܝܝܬܐ ܒܒܝܬ ܢܗܪ̈ܝܢ ܘܒܐܬܪ̈ܘܬܐ ܕܡܕܢܚܐ ܘܗܘܐ ܕܝܢ ܠܫܢܐ ܕܛܟܣܐ ܘܨܠܘ̈ܬܐ ܕܥܕܬܐ ܣܘܪܝܝܬܐ ܥܕܡܐ ܕܕܢܚ ܠܫܢܐ ܥܪܒܝܐ. ܗܝܕܝܢ ܐܝܕܐ ܒܐܝܕܐ ܐܬܡܚܠ ܠܫܢܐ ܣܘܪܝܝܐ ܘܫܬܩ ܒܐܬܪ̈ܘܬܐ ܡܢ ܡܪ̈ܘܗܝ ܘܥ̣ܠ ܠܕܘܟܬܗ݂ ܠܫܢܐ ܥܪܒܝܐ. ܒܬܪܟܢ ܐܬܒܛܠܘ ܕܝܢ ܒ̈ܬܝ ܨܘܒ̈ܐ ܘܡܕܖ̈ܫܬܐ ܣܘܖ̈ܝܝܬܐ. ܙܒ̈ܢܐ ܩܫ̈ܝܐ ܘܠܐ ܚܝܘ̈ܣܬܢܐ ܗܘܘ ܒܡܪܕܝܬܐ ܕܡܟܬܒܙܒܢܐ ܕܠܫܢܐ ܐܪܡܝܐ: ܗܘ ܕܐܝܕܐ ܒܐܝܕܐ ܫܪܝ ܕܢܬܩܪܐ ܒܫܡܐ ܡܪܟܒܐ ܚܕܬܐ ܟܐܡܬ «ܣܘܪܝܝܐ ܐܪܡܝܐ» ܘܠܚܪܬܐ ܒܠܚܘܕ ܒܫܡ ܣܘܪܝܝܐ. ܐܠܐ ܗܘ ܠܫܢܐ ܣܘܪܝܝܐ ܚ̣ܝܐ ܒܠܚܘܕ ܒܥܕ̈ܬܐ ܣܘܖ̈ܝܝܬܐ. ܐܬܒܨܪ ܠܫܢܐ ܐܪܡܝܐ ܒܡܡܠܠܐ ܟܝܬ ܘܒܟܬܝܒܬܐ ܘܢܦܩܘ ܡܢܗ ܠܥܙ̈ܐ ܘܦܖ̈ܥܐ ܐܚܪ̈ܢܐ.

ܒܡܫܬܘܬܦܢܘܬܐ ܕܥܡ ܚܘܝܕܐ ܣܘܪܝܝܐ ܬܒܝܠܝܐ ܐܫܬܬܐܣܬ ܐܟܕܡܝܐ ܕܠܫܢܐ ܣܘܪܝܝܐ ܒܝܘܡ ܟܐ̄ ܒܫܒܛ ܕܫܢܬ ܒܟܓ ܡܢ ܣܳܦ̈ܩܐ ܕܠܫܢܐ ܘܝܕܘܥ̈ܬܢܐ ܣܘܪ̈ܝܝܐ ܡܢ ܐܬܖ̈ܘܬܐ ܡܫܚ̈ܠܦܐ ܕܒܥܠܡܐ. ܒܬܪ ܡܐ ܕܒܦܠܓܘܬܐ ܬܪܝܢܝܬܐ ܕܕܪܐ ܕܥܣܪܝܢ ܐܫܩܠܘ ܣܘܖ̈ܝܝܐ ܣܓܝ̈ܐܐ ܡܢ ܡܬܗܘܢ ܒܝܬ ܢܗܪ̈ܝܢ ܠܐܬܖ̈ܘܬܐ ܕܐܘܪܝܦܝ ܫܪܝ ܕܢܬܡܚܠ ܠܫܢܐ ܣܘܪܝܝܐ ܘܗܘܐ ܠܗ ܩܢܛܐ ܪܒܐ.

ܥܠܗܕܐ ܕܪܫܘ ܚܕܚܕܢ̈ܐ ܡܢ ܣܘܖ̈ܝܝܐ ܐܟܕܡ̈ܝܐ ܐܝܟܢܝܘܬܐ ܕܠܫܢܐ ܘܫܒܝ̈ܠܐ ܘܡܟܢܘ̈ܬܐ ܠܡܛܪ ܠܠܫܢܐ ܗܢܐ. ܘܡܛܘ ܠܦܘܣܩܢܐ ܕܢܫܬܐܣܘܢ ܫܘܬܐܣܐ ܣܘܪܝܝܐ ܕܝܠܢܝܐ ܠܡܐܨܦ ܕܠܫܢܐ ܘܠܡܛܪܝܘܗܝ. ܗܟܢܐ ܫܬܐܣܘ ܗܠܝܢ ܝܨܘܦ̈ܬܢܐ ܐܟܕܡܝܐ ܕܠܫܢܐ ܣܘܪܝܝܐ ܕܢܗܘܐ ܐܘܪܓܢܘܢ ܕܝܠܢܝܐ ܠܠܫܢ ܣܘܪܝܝܐ ܐܪܡܝܐ.

ܢܝܫܐ ܕܝܠܢ ܕܐܟܕܡܝܐ ܕܠܫܢܐ ܣܘܪܝܝܐ ܐܝܬܘܗܝ ܕܢܐܨܦ ܕܠܫܢܐ ܣܘܪܝܝܐ ܘܕܢܛܪܝܘܗܝ ܒܫܒܝ̈ܠܐ ܡܫܚ̈ܠܦܐ ܠܫܖ̈ܒܬܐ ܕܐܬܝ̈ܢ ܘܕܢܦܪܘܣ ܡܘܕܥ̈ܢܘܬܐ ܘܝܕܥ̈ܬܐ ܥܠܘܗܝ.

ܐܟܕܡܝܐ ܕܠܫܢܐ ܣܘܪܝܝܐ ܐܝܬܝܗ̇ ܡܫܬܐܣܬܐ ܫܠܝܛܬ ܒܝܬܗ̇ ܘܡܛܟܣܬܐ ܠܦܘܬ ܩܢܘ̈ܢܐ ܡܬܚܡ̈ܐ ܒܢܡܘܣܗ̇.